પાનખર

ડાળ પર ટહુકા હતા, ને કોણ લાવી પાનખર?
લીલછમ સંસારમાં આ કેમ ફાવી પાનખર?

વાળ ધોળા, આંખ ઝાંખી, હાથ ધ્રૂજે છે છતાં,
વારતાઓથી બધું ઘર, લ્યો, સજાવી પાનખર.

ઝાડ ખાલી થઈ ગયું, પણ આભ દેખાયું ઘણું,
શૂન્યનો વિસ્તાર કેવો, એ બતાવી પાનખર.

પાન બોલ્યું: ‘હું ખરું તો મૂળને પોષણ મળે’,
અંતને પણ પર્વ જેવી, લ્યો, મનાવી પાનખર.

આ પરાગે ધૂળમાં પોઢી, અને બી થઈ ગયો,
આવતી કાલે વસંતો, એમ વાવી પાનખર.

– પરાગ રતનપરા

#ગઝલ #પાનખર #વૃદ્ધાવસ્થા #જીવનચક્ર #આશા #પરાગરતનપરા
#GujaratiGhazal #Autumn #OldAge #CycleOfLife #Renewal #ParagRatanpara