નવા શેઠ

નવા શેઠને ઓળખ્યા રે? કાલે તો ભાઈ ફેરિયા હતા,
આજે ગાડી, બંગલો ને ગળે સોનાના સેરિયા હતા!

કાલ સુધી તો ‘ભાઈ’ કહી સૌની સાથે ચા પીતા,
આજે ‘સર’ કહો તો જ ઊભા રહે, ને નજર ફેરવી લેતા;
જૂના મિત્રો દરવાજે ઊભા, ગાર્ડ કહે: ‘નથી ઘરમાં!’…
નવા શેઠને ઓળખ્યા રે?…

બાપુની ધોતી સંતાડી, બાનું ગામઠી બોલવું,
અંગ્રેજીમાં ‘સૉરી, થૅંક્યુ’, ગુજરાતીમાં તોલવું;
ભૂલી ગયા કે કાલે એ જ ચાલીના ઓરડિયા હતા…
નવા શેઠને ઓળખ્યા રે?…

પરાગ કહે: નસીબનું ચક્કર, આજ ઉપર, કાલ નીચે,
ગઈકાલને જે યાદ રાખે, એ જ સાચું સીંચે;
પૈસા આવે-જાય, પણ ઊંચા તો ધરતી પર પગ હતા…
નવા શેઠને ઓળખ્યા રે?…

– પરાગ રતનપરા