ન બોલાયું

કહેવું’તું ઘણું તમને, ખરે ટાણે ન બોલાયું,
બધાં બેઠાં હતાં સાથે, પછી ભાણે ન બોલાયું.

ખિસું કાપ્યું હતું કોકે, ગયો ફરિયાદ લઈ સીધો,
જમાદારે ઉઘાડ્યું મોં, પછી થાણે ન બોલાયું.

જુવાનીમાં ગયો બેટો, પિતા પથ્થર બની બેઠા,
ખભે મૂક્યો જરા મેં હાથ, ને કાણે ન બોલાયું.

હતો મંચે, હતું માઇક, ભરી’તી હોલમાં ભીડો,
તને ત્યાં જોઈ સામે, તો પછી ગાણે ન બોલાયું.

ભ્રમરગીતો પરાગે રાતભર સુણિયાં, છતાં એણે
ગયો ઊડી હવામાં, તોય ઠેકાણે ન બોલાયું.

– પરાગ રતનપરા

#ગઝલ #મૌન #અધૂરીવાત #વેદના #વ્યંગ #પરાગરતનપરા
#GujaratiGhazal #UnspokenWords #Silence #Grief #WordsThatFailed #ParagRatanpara