મોકલું

હોઠ પર અટકી રહેલી એ જ વાતો મોકલું,
જાગતાં ગાળી અમે તે સૌ ય રાતો મોકલું.

એ દિવાળીએ સજાવેલા તમારા આંગણે
આજ પણ ઝળહળ થતી એ સર્વ ભાતો મોકલું.

એ નદીના ઘાટ પર કલરવ ભરેલી, ઓસથી
સાથ જોયાં’તાં અમે જે, એ પ્રભાતો મોકલું.

તું હસે છે ત્યાં, ભલે, પણ આંખ મારી ભીંજતી,
આંસુઓના ધોધ જેવા એ પ્રપાતો મોકલું.

આ પરાગે ફૂલ સાથે ગાંઠ જે બાંધી હતી,
એ સુગંધી ગાંઠનો આ આજ નાતો મોકલું.

– પરાગ રતનપરા

#ગઝલ #પ્રેમ #વિરહ #સ્મૃતિ #સંદેશ #પરાગરતનપરા
#GujaratiGhazal #LoveAcrossDistance #Separation #Memories #Longing #ParagRatanpara