મંગળ ફેરા

ફેરા ફરે મારી લાડકવાઈ, મંડપ મંગળ ગાય,
શરણાઈના સૂર સાંભળી માનું હૈયું ભરાય.

પહેલે ફેરે ઢીંગલી છૂટી, બીજે ફેરે ઝૂલો,
ત્રીજે ફેરે આંગણ છૂટ્યું, ચોથે તુલસી-ચૂલો;
આંખ ભીની ને હોઠ હસે, આ કેવો ઉત્સવ થાય!
ફેરા ફરે મારી લાડકવાઈ…

બાપુ ઊભા થાંભલી પાસે, મૂછે દીધો વળ,
કન્યાદાને હાથ ધ્રૂજ્યો, આંખે ઊમટ્યું જળ;
આખો મંડપ જોતો રહ્યો, પથ્થર પીગળી જાય…
ફેરા ફરે મારી લાડકવાઈ…

પરાગ કહે: દીકરી તો ઘરનો તુલસીક્યારો, ભાઈ,
જ્યાં જાય ત્યાં ઘર મ્હેકાવે, એવી એની વધાઈ;
ગાઓ મંગળ, વરસો ફૂલો, લાડી સાસરે જાય…
ફેરા ફરે મારી લાડકવાઈ…

– પરાગ રતનપરા