મંદિરે

કેટલો મોટો તમારો છે ચઢાવો મંદિરે?
એ પ્રમાણે દર્શનોનો છે લહાવો મંદિરે.

ભીડમાં ભીંસાઈ ભક્તો જીવ ખોતા, પણ ગણો
સાવ નાના, રોજના એ તો બનાવો મંદિરે.

દ્વાર પર ભૂખ્યો ભિખારી, ભોગ છપ્પન ભીતરે,
આ ખરો કે એ ખરો? કેવો ભુલાવો મંદિરે!

આમ ભક્તો તાપમાં ઊભા કલાકો લાઇને,
ખાસને ઝટ દ્વાર ખૂલે, ને વધાવો મંદિરે.

આ પરાગે ફૂલ ધર્યું, તો પુજારી બોલિયા:
‘ફૂલ છોડો, ભાઈ, નોટો સાથ લાવો મંદિરે.’

– પરાગ રતનપરા

#ગઝલ #વ્યંગ #ધર્મ #આડંબર #ભક્તિ #પરાગરતનપરા
#GujaratiGhazal #Satire #ReligiousHypocrisy #VIPDarshan #FaithAndMoney #ParagRatanpara