મનનો પતંગ

આકાશમાં ઊડ્યા કરે છે રાતદી મનનો પતંગ,
દોરી વિના શું છે ભલા, એની ઉડાનો કે ઉમંગ?

પેચો લડાવ્યા લાખ મેં, કાપ્યા ઘણાના દોર પણ,
ને અંતમાં જાતે કપાયો, જોઈ હું તો સાવ દંગ.

તારી અગાશી પર ગયો મારો કનકવો એક સાંજ,
ત્યારે ગગન આખું થયું’તું એ જ પળમાં લાલ રંગ.

દિલ્હી સુધી નેતા ચગાવે વાયદાના ઢગ બધા,
માંજો ઘસાયો કંઠ પર, ઘાયલ થયું છે અંગઅંગ.

ના દોર, ના ફિરકી, ન ધાબાં, ઓ ‘પરાગ’, ન હાથ પણ,
ઊડ્યા કરું છું વાયરા સાથે બનીને હું મલંગ.

– પરાગ રતનપરા

#ગઝલ #પતંગ #ઉત્તરાયણ #મન #મુક્તિ #પરાગરતનપરા
#GujaratiGhazal #KiteOfMind #Uttarayan #FreeSpirit #Detachment #ParagRatanpara