મારા પછી

કોણ વાળે રોજ મારું આંગણું મારા પછી?
કોણ ખોલી રાખશે આ બારણું મારા પછી?

ઓટલે બેસી અમે જે ગામગપ્પાં મારતા,
કોણ બાળે સાંજનું એ તાપણું મારા પછી?

પૌત્રને ઝૂલે ઝુલાવી ગીત ગાઉં રોજ, પણ
કોણ હીંચે એ જ ઝીણું પારણું મારા પછી?

જે અગાસીએ ગણીને રાતભર તારા, હવે
કોણ પીશે ત્યાં ઝરેલું ચાંદણું મારા પછી?

આ પરાગે તો હવામાં ઓગળી જાશે, છતાં
મ્હેકશે કો’ દ્વારનું એ તોરણું મારા પછી.

– પરાગ રતનપરા

#ગઝલ #વૃદ્ધાવસ્થા #ઘર #સ્મૃતિ #વિદાય #પરાગરતનપરા
#GujaratiGhazal #OldAge #AfterIAmGone #Home #Legacy #ParagRatanpara