માણી લે

નગારાં ગાજતાં મેળે, જરા આ ઢોલ માણી લે,
પવન ડોલે, ધરા ઝૂમે, ખડો આ મોલ માણી લે.

ભરોસો કાલનો ક્યાં છે? ઘડી છે આજની પાસે,
હજી છે માવડી, ‘બેટા’ કહે, એ બોલ માણી લે.

ઝરણનું ગીત, પંખી, પાંદડાં પર ઝાકળી મોતી,
ગલીમાં ભૂલકાંનો આ જરા કલ્લોલ માણી લે.

ગણીને શ્વાસ આપ્યા છે, વિધાતાએ લખી આપ્યું,
ફરી મળશે નહીં આ ભવ, પળો અણમોલ માણી લે.

ખરે ફૂલો, ખરે પાંદો, ખરે છે આયખું આખું,
પરાગે ડાળ પરથી, આ હવાનો ઝોલ માણી લે.

– પરાગ રતનપરા

#ગઝલ #આજ #જીવનઉત્સવ #મા #ક્ષણ #પરાગરતનપરા
#GujaratiGhazal #LiveNow #CelebrateLife #Mother #PreciousMoments #ParagRatanpara