મામાનું ઘર

વેકેશન પડ્યું ને હાલો રે મામાને ઘેર,
ગાડું જોડ્યું, બળદ દોડ્યા, ધૂળ ઊડે ચોમેર.

મામી બનાવે સુખડી ને મામા લાવે કેરી,
નાનીમા તો વાર્તા માંડે, રાત પડે અંધારી;
ભાણિયા સૌ ધમાલ કરે, ના કોઈ રોકટોક, ના વેર…
વેકેશન પડ્યું ને હાલો…

વાડીએ જઈ કૂવે નહાઈએ, ચડીએ આંબા-ડાળે,
ગાય દોહીએ, વાછરડું રમે, ઘૂઘરા વાગે ગળે;
સાંજે ખાટલે આભ જોઈએ, તારા ગણીએ ઢેર…
વેકેશન પડ્યું ને હાલો…

પરાગ કહે: આ મામાનું ઘર મોબાઈલમાં ક્યાં મળશે?
ગામડાંની એ માટી-મ્હેક ક્યાં ‘ગેમ’માં ઊછળશે?
ફરી ફરીને આવજો બાળકો, ભરજો હૈયે લહેર…
વેકેશન પડ્યું ને હાલો રે મામાને ઘેર.

– પરાગ રતનપરા