ખોલ તું

આભ આખું રાહ જોતું, બંધ બારી ખોલ તું,
ભીતરે જે સંઘરી છે, એ પિટારી ખોલ તું.

બીજ વાવ્યાં’તાં સપનનાં, ધૂળમાં ઢંકાઈ ગ્યાં,
ઓસ વરસાવે ગગન, લે, ફૂલ-ક્યારી ખોલ તું.

ક્યાં સુધી માથે ઉપાડી રાખશે ગઈ કાલને?
ને ઉતારી નાખ, જૂની વેર-ભારી ખોલ તું.

ભોંય સૂકી, છોડ ભૂખ્યા, રાહ જોતા છે બધા,
આજ તો વરસાવ કરુણા, આંખ-ઝારી ખોલ તું.

બંધ ફૂલોમાં ‘પરાગે’ ગૂંગળાવું ક્યાં સુધી?
છોડ મ્હેકોને હવામાં, આ અટારી ખોલ તું.

– પરાગ રતનપરા

#ગઝલ #મુક્તિ #ખુલ્લુંમન #ક્ષમા #કરુણા #પરાગરતનપરા
#GujaratiGhazal #OpenUp #LetGo #Forgiveness #Compassion #ParagRatanpara