કેસૂડાનો ચોર

કેસૂડાની ડાળે બેઠો ફાગણ રંગીલો મોર,
રંગ ઢોળવા આવ્યો મારે આંગણ છાનો ચોર.

વાડે વાડે ખાખરા ફૂટ્યા, ઝાળ લાગી વગડે,
પવન પીંછી લઈને દોડે, સીમ આખી રંગડે;
ધૂળ ઊડે ને ગુલાલ થાતી, ગામ થયું ગુલફોર…
રંગ ઢોળવા આવ્યો…

પાણિયારે પિત્તળની હેલ્ય, હેલ્યમાં કેસર ઘોળ્યું,
સાહ્યબાએ છાનામાના મારું પાનેતર બોળ્યું;
લાજ કાઢું તો ય ભીંજાઉં, એનું ક્યાં ચાલે જોર?
રંગ ઢોળવા આવ્યો…

પરાગ કહે: આ ફાગણ ચોર નહીં, એ તો શાહુકાર,
એક દિવસનો રંગ દઈને લે છે ભવનો ભાર;
કોરી રહી ગઈ જે ચૂંદડી, એનો સાંભળે કોણ શોર?
રંગ ઢોળવા આવ્યો મારે આંગણ છાનો ચોર.

– પરાગ રતનપરા