કાન ક્યાં?

ગોકુળ શોધ્યું, મથુરા શોધ્યું, શોધી દ્વારિકા સારી,
કાન તો મળ્યો રાધાની બે આંખોની અટારી.

વનમાં ગોત્યો, જમનાતીરે, કદંબની ડાળે ડાળે,
ગાયોના ધણ પાછળ દોડ્યા, ધૂળ ઊડી ગોવાળે;
વાંસળી તો વાગી ત્યાં, જ્યાં રાધા બેઠી હારી…
ગોકુળ શોધ્યું…

મંદિરમાં તો મૂરત સોનું, મોરપીંછ ને મુગટ,
પણ રાધાની આંખે એ તો ગોવાળિયો નટખટ;
એની પાંપણ ઢળે ત્યાં તો રાસ રમે ગિરધારી…
ગોકુળ શોધ્યું…

પરાગ કહે: જેને જોઈએ શ્યામ, એ રાધા થઈ જાય,
પ્રેમ ભરી બે આંખોમાં તો આખું વૃંદાવન સમાય;
બાકી સૌ તીરથ ફરે, ને પાછા ફરે ખાલી ઝારી…
ગોકુળ શોધ્યું…

– પરાગ રતનપરા