ઝોળીમાં

બધાને આપજે ફૂલો, મને બસ રાખ ઝોળીમાં,
ભલે ખાલી રહું, પણ દે જગતને લાખ ઝોળીમાં.

પરિંદાંને ગગન આખું, હવા આખી, દિશા આખી,
મને તૂટેલ એકાદી ભલે દે પાંખ ઝોળીમાં.

જગતને દે નવાં દૃશ્યો, ઉષાના રંગ સૌ સાતે,
મને દે પારકી પીડે ભરેલી આંખ ઝોળીમાં.

બધાને દે ભલે પદવી, બધાને નામ ને નાણાં,
મને બસ સાદગીની એક દેજે શાખ ઝોળીમાં.

‘પરાગે’ ક્યાં કશું માગ્યું? ગઝલ પૂરી હતી એને,
ગઝલનો નાથ, તું થાજે સદાની સાખ ઝોળીમાં.

– પરાગ રતનપરા

#ગઝલ #પ્રાર્થના #ફકીરી #પરમાર્થ #સાદગી #પરાગરતનપરા
#GujaratiGhazal #SelflessPrayer #Fakir #Compassion #Simplicity #ParagRatanpara