હરિના હસ્તાક્ષર

મેં હરિને પૂછ્યું:
‘તમારી સહી ક્યાં છે?
આટલું મોટું જગત બનાવ્યું,
ને નીચે નામ પણ નહીં?’

હરિ હસ્યા.

પછી સવારે
મેં જોયું —
દૂધીના વેલાએ
વાડ પર
એક વાંકીચૂંકી લીટી દોરી હતી.

બપોરે
નદીના પટમાં
પાણી ખસી ગયા પછી
રેતી પર એવી જ લીટી.

સાંજે
દાદીમાના કપાળે
કરચલીઓની એવી જ લીટી.

ને રાતે
મારા દીકરાએ
પહેલી વાર પેન પકડી
ને કાગળ પર
બરાબર એ જ લીટી પાડી.

હવે હું
સહી શોધતો નથી.
બસ, વાંચતો રહું છું.

– પરાગ રતનપરા