હલેસાં

નદી પાર કરવા, થકેલાં હલેસાં,
હજી હાથમાં છે ઘસેલાં હલેસાં.

જવાની હતી, ત્યાં હતાં ફૂલ જેવાં,
હવે ભાર લાગે નમેલાં હલેસાં.

મુસાફર બધા સાંજ ટાણે ગયા, ને
હવે નાવમાં છે તજેલાં હલેસાં.

કહે પૌત્ર: ‘દાદા, નવું યંત્ર લાવો’,
કહું: ‘આ જ મારાં ગમેલાં હલેસાં.’

પરાગે પવનની સવારી કરી, ને
હતાં પાંખડીનાં મઢેલાં હલેસાં.

– પરાગ રતનપરા

#ગઝલ #વૃદ્ધાવસ્થા #નાવિક #જીવનયાત્રા #પરિશ્રમ #પરાગરતનપરા
#GujaratiGhazal #OldBoatman #LifeJourney #Perseverance #OldAge #ParagRatanpara