ગરમ છે

ધોમ તડકો, લૂ વહે, ને આ ય પાણી ગરમ છે,
મંચ પર નેતા તણી પણ આજ વાણી ગરમ છે.

ઓરડે કૂલર ચલાવ્યું, તોય ઠંડક ના મળી,
કેમ કે ઘરમાં હજી મારી ય રાણી ગરમ છે!

કીટલી પર ગામ ભેગું થઈ ગયું છે સાંજના,
ને પડોશીની જુઓ, તાજી કહાણી ગરમ છે.

આસમાને તેલના ભાવો ગયા છે આજકાલ,
હું બળદ જેવો ફરું છું, તોય ઘાણી ગરમ છે.

તાપમાં ધરતી બની આખી ય ચૂલો, ઓ ‘પરાગ’,
દાણ વેરો રેતમાં, ને ત્યાં જ ધાણી ગરમ છે!

– પરાગ રતનપરા

#ગઝલ #હાસ્ય #ઉનાળો #ગરમી #મોંઘવારી #પરાગરતનપરા
#GujaratiGhazal #Humour #Heatwave #SummerSatire #Inflation #ParagRatanpara