ગઝલમાં

આંસુઓ કોરાં કરીને હું વહાવું ગઝલમાં,
ને હૃદયના ઘાવને ફૂલો બનાવું ગઝલમાં.

હોઠ પર ક્યારેય આવ્યો ના, હતો જે પ્રેમ, તો
નામ તારું શબ્દ વચ્ચે હું છુપાવું ગઝલમાં.

શોક ઘેર્યું ગામ આખું, ને ઉદાસી ઘેર ઘેર,
વ્યંગની ચપટી ભરીને સૌ હસાવું ગઝલમાં.

લોક ઊંઘે છે નિરાંતે, ને ફરે અન્યાય રોજ,
હાથમાં લઈ શબ્દ, સૌને હું જગાવું ગઝલમાં.

આ ‘પરાગે’ ફૂલ ચૂંટ્યાં ક્યાં કદી? એ ડાળ પર
મ્હેક થઈને બાગ આખો હું ઝુલાવું ગઝલમાં.

– પરાગ રતનપરા

#ગઝલ #ગઝલનોજાદુ #શબ્દ #કવિધર્મ #સંવેદના #પરાગરતનપરા
#GujaratiGhazal #PowerOfGhazal #PoetsDuty #WordsAsLight #Expression #ParagRatanpara