ફ્રેમમાં

ભીંત પર બા ને પિતાની સાથ છાયા ફ્રેમમાં,
હાર સુક્કો, ધૂળ થોડી, શાંત કાયા ફ્રેમમાં.

કોણ લૂછે ધૂળ? બાળક સૌ ગયાં પરદેશમાં,
સાવ ખાલી ઘર, હવે ઘરના જ પાયા ફ્રેમમાં.

પીપળો, પાદર, નદી, ને ગાયનું એ ધણ બધું,
ગામ આખાની ભરી છે સૌ જ માયા ફ્રેમમાં.

એક છત નીચે હતાં જે, સૌ થયાં નોખાં હવે,
એક આ ફોટે હજી ભેળા પરાયા ફ્રેમમાં.

કાલ ભીંતે હું ય ટીંગાઉં, ભલે ને, ઓ પરાગ,
જોઈ લેશે કોઈ દી, મારા ય જાયા ફ્રેમમાં.

– પરાગ રતનપરા

#ગઝલ #તસવીર #માતાપિતા #સંયુક્તકુટુંબ #સ્મૃતિ #પરાગરતનપરા
#GujaratiGhazal #PhotoFrame #Parents #FamilyMemories #EmptyNest #ParagRatanpara