એવા પ્રેમીઓ

આ જગતમાં
એવા પ્રેમીઓ પણ છે
જેમણે ક્યારેય
‘પ્રેમ’ શબ્દ બોલ્યો નથી.

એ સવારે
બીજાની ચામાં
ખાંડ ઓછી નાખે છે,
ને પોતાની દવા
ભૂલી જાય છે.

એ ગુલાબ નથી આપતા,
પણ છત્રી
હંમેશાં
બીજાના માથા તરફ
વધારે નમાવે છે.

એમના ફોટામાં
બંને
કેમેરા સામે જુએ છે,
પણ ફોટો પાડનાર જાણે છે
કે ક્લિક થતાં પહેલાં
બંનેએ
એકબીજાનો હાથ
ચુપકીથી શોધ્યો હતો.

ને જ્યારે એક જાય છે,
ત્યારે બીજો
કશું બોલતો નથી —
બસ
રોજ સાંજે
બે કપ ચા બનાવે છે,
ને એક
ઠંડી થવા દે છે.

– પરાગ રતનપરા