દૃશ્યો

મોતિયો બાની નજરમાં, ધૂંધળાં દૃશ્યો હવે,
ટેરવાંથી ઓળખે છે, પાંગળાં દૃશ્યો હવે.

એ જ આંખે સોયમાં દોરો પરોવ્યો'તો કદી,
ને પછી ભીંતે અડી, ને આંધળાં દૃશ્યો હવે.

ઑપરેશન થઈ ગયું, ને પાટ ખૂલી આજ તો,
દીકરાને જોઈ બોલી, ‘ઊજળાં દૃશ્યો હવે!’

આંખ સૌની ફોન પર છે, મોતિયો ના, તે છતાં
જિંદગીના ચાર ઇંચે પાતળાં દૃશ્યો હવે.

આ પરાગે જોઈ સઘળું, તોય ના જોયું કશું,
બંધ આંખે શ્યામ દેખ્યા, સાંવળાં દૃશ્યો હવે.

– પરાગ રતનપરા

#ગઝલ #દૃષ્ટિ #મા #મોતિયો #ભીતરનીઆંખ #પરાગરતનપરા
#GujaratiGhazal #Vision #Mother #Cataract #InnerSight #ParagRatanpara