દીવાનગી

દીવડે ઝૂકી પતંગા, આગની દીવાનગી,
વાંસળીના સૂર પાછળ રાગની દીવાનગી.

રંગ ઊડે, ઢોલ ગાજે, ગામ આખું ઝૂમતું,
આ ગુલાલી પર્વ છે, કે ફાગની દીવાનગી?

પાનખરમાં ઠૂંઠને પણ સીંચતો માળી સદા,
કૂંપળોની આશ છે, કે બાગની દીવાનગી?

રાતના છાના જ છોડ્યાં રાજ, રાણી, બાળ જે,
એ હતી સિદ્ધાર્થના એ ત્યાગની દીવાનગી.

આ ‘પરાગે’ મ્હેક આપી સૌ ભ્રમરને, ખુદ છતાં
હાથ ખાલી, એ હતી એ ભાગની દીવાનગી.

– પરાગ રતનપરા

#ગઝલ #દીવાનગી #ઘેલછા #ત્યાગ #પ્રેમ #પરાગરતનપરા
#GujaratiGhazal #Madness #Passion #Renunciation #Obsession #ParagRatanpara