દીધું

મને જીવવું, પણ નહીં ભાન દીધું,
ગળું દઈ, નથી એક પણ ગાન દીધું.

અમે આભ પામ્યા, છતાં પાંખ કાપી,
નથી એક પણ બેસવા સ્થાન દીધું.

ભણાવ્યા અમોને બધા વેદ-ગ્રંથો,
નહીં આંસુ વાંચી શકે જ્ઞાન દીધું.

હતા આયના ઓરડે ઓરડે સૌ,
ન પોતા તરફ સ્હેજ પણ ધ્યાન દીધું.

પરાગે ન માગ્યું વધારે કશું પણ,
હતું તે ગઝલમાં ફરી દાન દીધું.

– પરાગ રતનપરા

#ગઝલ #નિયતિ #વિરોધાભાસ #આત્મખોજ #સંતોષ #પરાગરતનપરા
#GujaratiGhazal #Destiny #Irony #SelfAwareness #Contentment #ParagRatanpara