દર્શનની કતાર

મંદિરની લાંબી કતારમાં
મા અને દીકરો
ત્રણ કલાકથી ઊભાં છે.

બાજુના દરવાજેથી
સફેદ કપડાંવાળા કેટલાક લોકો
સીધા ગર્ભગૃહમાં પહોંચી જાય છે.

દીકરો પૂછે છે:
‘મા, ભગવાનને ત્યાં પણ
વી.આઈ.પી. હોય?’

મા કશું બોલતી નથી,
માત્ર એનો હાથ
થોડો વધારે કસીને પકડે છે.

આખરે વારો આવે છે.
પૂજારી ધક્કો મારે છે — ‘ચાલો, ચાલો.’
એક પળનું દર્શન.

બહાર નીકળીને
દીકરો કહે છે:
‘મા, મને લાગ્યું
ભગવાન મારી સામે હસ્યા.’

મા પહેલી વાર રડી પડે છે.
એને ખબર છે —
આજે ભગવાને
કતારમાં ઊભા રહેનારને
પસંદ કર્યો હતો.

– પરાગ રતનપરા