છે ગઝલ

માતૃભાષાના હૃદયમાં સાવ છાની છે ગઝલ,
બાળપણના ઘૂઘરા જેવી જ માની છે ગઝલ.

ફારસીના દેશથી આવી ભલે ગુજરાતમાં,
લોકબોલીમાં ભળી, એવી સયાની છે ગઝલ.

હાથમાં હસ્તાક્ષરો જેવી જ ઓળખ આપણી,
આપણી ભાષા તણી ઉજળી નિશાની છે ગઝલ.

કોઈ મીરાંના ભજનમાં, કોઈ નરસૈંયા તણી,
પ્રેમમાં ઘેલી બનીને, થઈ દિવાની છે ગઝલ.

આ પરાગે માત્ર એની મ્હેક ઝીલી છે અહીં,
ક્યાં કહું મોટી? છતાં ના સાવ નાની છે ગઝલ.

– પરાગ રતનપરા

#ગઝલ #ગુજરાતીભાષા #માતૃભાષા #ગઝલનોમહિમા #ભજન #પરાગરતનપરા
#GujaratiGhazal #MotherTongue #GujaratiLanguage #PoetryOfPoetry #LiteraryHeritage #ParagRatanpara