ચાંદ પર પગલાં

ટીવી પર સમાચાર હતા:
‘આપણે ચાંદ પર પહોંચી ગયા!’

આખું ગામ તાળી પાડતું હતું,
ફટાકડા ફૂટતા હતા.

દાદીમા ચૂપચાપ
અગાશીએ ગયાં,
ચાંદ સામે જોયું,
ને ધીમેથી બોલ્યાં:

‘એમાં તો મારો રેંટિયો કાંતતી ડોશી હતી,
ને એક સસલું હતું,
ને કરવાચોથે
તારા દાદાનું મોઢું ત્યાં જ દેખાતું.’

‘હવે ત્યાં
લોઢાનું યંત્ર ઊભું છે?’

મેં કહ્યું: ‘હા, દાદીમા.’

દાદીમાએ
ચાંદ સામે ચારણી ધરી,
ને આંખ મીંચી.

વિજ્ઞાને ચાંદ જીત્યો,
દાદીમાએ
ચાંદ બચાવી રાખ્યો.

– પરાગ રતનપરા