ભેટવાનું ગીત

ખુલ્લા હાથે આવો રે સાજન, ખુલ્લું રાખો મન,
બંધ મુઠ્ઠીમાં ક્યાંય સમાયું વરસાદી આંગણ?

ગાંઠ વાળેલી ચૂંદડીએ તો રંગ ન ચડે લગાર,
રીસ ભરેલી આંખે ક્યાંથી ઊઘડે કોઈ સવાર?
પહેલાં ઉંબર ઓળંગો ને પછી કરો વંદન…
ખુલ્લા હાથે આવો રે સાજન…

ભેટવા માટે છાતીમાં થોડી જગ્યા રાખવી પડે,
અહંકારનું પોટલું ઝાંપે ઉતારવું પડે;
હળવા થઈને આવે એને ઝીલે નીલ ગગન…
ખુલ્લા હાથે આવો રે સાજન…

પરાગ કહે: આ ભેટ નથી, આ બે નદીઓનો મેળ,
એક થયાં પછી કોણ ગણે છે કોનો કેટલો ખેલ?
ખાલી થઈને ભરાઈ જવાનું એ જ સાચું જીવન…
ખુલ્લા હાથે આવો રે સાજન…

– પરાગ રતનપરા