ભજનમાં

બની તાલ, ઝૂમે હથેળી ભજનમાં,
રમે રાધિકા ને સહેલી ભજનમાં.

ન સોનું, ન ચાંદી, ન હીરા-ઝવેરાત,
છતાં ઝળહળે છે હવેલી ભજનમાં.

ત્યજી રાજ-રાણું, ત્યજી લોકલાજો,
હવે મસ્ત મીરાં અકેલી ભજનમાં.

થયો દેહ ઘરડો, નમી છે કમર પણ,
છતાં આતમા છે નવેલી ભજનમાં.

પરાગે ગઝલમાં સુગંધો વહાવી,
કહે: આજ ખુશ્બૂ પહેલી ભજનમાં.

– પરાગ રતનપરા

#ગઝલ #ભજન #ભક્તિ #મીરાં #કૃષ્ણ #પરાગરતનપરા
#GujaratiGhazal #Bhajan #Devotion #Meera #Krishna #ParagRatanpara