બાળપણ પાછું આપો

મારી ડિગ્રીઓ લઈ લો,
મારો પગાર, મારી ગાડી,
મારું ‘સર’ કહેવાવાનું માન પણ.

ને બદલામાં
એક ભરબપોર આપો —
જ્યારે બા સૂતી હોય
ને હું ચૂપચાપ
વાડામાંથી કાચી કેરી ચોરવા નીકળું.

એક વરસાદી સાંજ આપો —
કાગળની હોડી
ને ગટરના પાણીમાં
દરિયાપારનો પ્રવાસ.

એક નિશાળની ઘંટડી આપો,
એક પતંગ,
એક ફાટેલું ખિસ્સું
જેમાં લખોટીઓ ખખડે.

ના, ના,
મને ઉંમર પાછી નથી જોઈતી;
મને તો
એ ઉંમરનું
કશાથી ન ડરવું
પાછું જોઈએ છે.

– પરાગ રતનપરા