અરીસો

કશું પણ કહે ના, ન બોલે અરીસો,
છતાં ભેદ સઘળા ય ખોલે અરીસો.

કરી દીકરીને વિદા, ત્યારથી તો
હજી ચાંદલો એ ટટોલે અરીસો.

નથી ત્રાજવું પાસ, તોયે સવારે
મને રોજ પૂરો જ તોલે અરીસો.

હવે ફોનમાં સૌ સજે છે, બિચારો
અનાથો સમો આજ ડોલે અરીસો.

પરાગે ઉતાર્યાં બધાં આવરણ, ને
ફરી પડ પછી પડ જ ફોલે અરીસો.

– પરાગ રતનપરા

#ગઝલ #અરીસો #સત્ય #દીકરી #આત્મખોજ #પરાગરતનપરા
#GujaratiGhazal #Mirror #Truth #DaughtersFarewell #SelfDiscovery #ParagRatanpara