અપૉઇન્ટમેન્ટ

મેં મારી જાતને મળવા
અપૉઇન્ટમેન્ટ માગી.

સેક્રેટરીએ ડાયરી ખોલી:
‘સોમવારે મીટિંગ છે,
મંગળવારે ટૂર,
બુધવારે લગ્ન,
ગુરુવારે બેસણું,
શુક્ર-શનિ ઓવરટાઇમ,
ને રવિવારે તો
આખું કુટુંબ મૉલમાં જવાનું છે.’

‘આવતા મહિને?’

‘એ તો એથીય ભરચક છે, સાહેબ.’

હવે
હું મને મળું છું
રોજ રાતે
માત્ર બે મિનિટ —
બાથરૂમના અરીસામાં,
દાંત ઘસતાં ઘસતાં.

એ પણ
મોં ભરેલું હોય છે,
એટલે
કશું બોલી શકાતું નથી.

– પરાગ રતનપરા