અનાયાસે

શિલામાંથી ઝરણ જેવું કશું ફૂટ્યું અનાયાસે,
હતું બંધન જનમભરનું, ક્ષણે તૂટ્યું અનાયાસે.

ન તીરથ, ના તપસ્યા, ના જ માળા, ના કશું વ્રત પણ,
છતાં ભીતર તણું સઘળું તમસ ખૂટ્યું અનાયાસે.

ન ઉપવન, ના વસંતો, ના હતો માળી, ન ક્યારો પણ,
હૃદયમાંથી કમળ કોણે સહજ ચૂંટ્યું અનાયાસે?

વરસ વીત્યાં હતાં મૌને, ન સ્વર, ના શબ્દ, ના લય પણ,
ગળેથી ગીત એ રીતે પછી છૂટ્યું અનાયાસે.

ન માગ્યું મેં, ન યાચ્યું મેં, ભ્રમર થઈને પરાગ અહીં,
છતાં ફૂલો તણું આખું ગગન લૂંટ્યું અનાયાસે.

– પરાગ રતનપરા

#ગઝલ #અનાયાસ #કૃપા #મૌન #આત્મજાગૃતિ #પરાગરતનપરા
#GujaratiGhazal #Grace #Serendipity #InnerLight #Awakening #ParagRatanpara