આવશે

બારણે આંખો ધરી બસ એ જ, ‘ક્યારે આવશે?’
રાત આખી દીવડો બોલ્યો: ‘સવારે આવશે.’

નાવ આવી, નાવ ચાલી, ઘાટ પણ સૂનો થયો,
આશ કે’ છે: ‘કાલ નક્કી એ કિનારે આવશે.’

ફૂલ સૌ કરમાઈ ગ્યાં, ને સાંજ પણ ઢળતી રહી,
તોય માને મન, વસંતી કો બહારે આવશે.

પત્ર ના, સંદેશ ના, ના ફોનની ઘંટી કશે,
તોય લાગે, એ જ પગલે આજ દ્વારે આવશે.

રાહ જોતાં ફૂલ ખરવાને થયું, તોયે ‘પરાગ’,
મ્હેક કે’ છે: ‘એ હવાના કો પુકારે આવશે.’

– પરાગ રતનપરા

#ગઝલ #ઇંતેઝાર #પ્રતીક્ષા #આશા #વિરહ #પરાગરતનપરા
#GujaratiGhazal #Waiting #Hope #Longing #Separation #ParagRatanpara