વતન બોલે છે

ગમે ત્યાં હું વસું, મારી નસોમાં વતન બોલે છે,
ભલે હોઠે ચડે ‘હૅલો’, હૃદયમાં સ્વજન બોલે છે.

હજી પણ પાદરે ઊભી ભરેલી ગાગરે ગોરી,
વિદેશે પણ મને એ લાજભીનું નયન બોલે છે.

અહીં હોળી મનાવે છે, રજા ભાળી, બધા ભેગા,
છતાં ભીતર હજી હોળી, ગુલાલી પવન બોલે છે.

અહીં આકાશ ઊંચું છે, મકાનોમાં પુરાયું છે,
મને ખુલ્લું, સિતારાથી ભરેલું ગગન બોલે છે.

પરાગ કહે, ગઝલ લખવા ભલે બેસું વિદેશે હું,
કલમમાંથી હજી માનું સુરીલું કવન બોલે છે.

– પરાગ રતનપરા

#ગઝલ #માતૃભાષા #વતન #પરદેશ #ગુજરાતી #પરાગરતનપરા
#GujaratiGhazal #MotherTongue #Homeland #Diaspora #GujaratiPride #ParagRatanpara