વર્ષો પછી

બાપુજીનો સાવ સૂનો ઓરડો વર્ષો પછી,
ને હજી ત્યાં ઝૂલતો’તો હીંચકો વર્ષો પછી.

રોજ ખિસ્સામાં લખોટી ખખડતી’તી, આજ ત્યાં
નીકળે ગોળી ભરેલો ડાબલો વર્ષો પછી.

‘તું’ કહીને બોલતો એ મિત્ર બોલ્યો ‘આપ’ પણ,
ભેદ સમજાવી ગયો એ આંચકો વર્ષો પછી.

બાપની બીકે કદી જ્યાં બેસવા પામ્યો નહીં,
એ જ ભીંજાયો, રડીને, ખાટલો વર્ષો પછી.

આ ‘પરાગે’ પત્ર પીળો ખોલતાં જોયું, અરે!
બા લખે: ‘આવી ગયો છે મોરલો’, વર્ષો પછી.

– પરાગ રતનપરા

#ગઝલ #ઉંમર #સ્મૃતિ #પિતા #બાળપણ #પરાગરતનપરા
#GujaratiGhazal #Ageing #Memories #Father #LostChildhood #ParagRatanpara