વાંચું છું

નથી કેવળ કિતાબો, રાતભર આકાશ વાંચું છું,
હથેળીમાં ધરીને નાડ, મારા શ્વાસ વાંચું છું.

કિલાની ભીંત ભાંગેલી, ઝરૂખા ધૂળથી ઢાંક્યા,
ઘસાયેલી શિલાઓમાં, ખરો ઇતિહાસ વાંચું છું.

નિરક્ષર મા હતી, પણ એ ભણાવી ગઈ મને સઘળું,
હજી એની હથેળીની બધી મીઠાશ વાંચું છું.

નવી પેઢી ભલે વાંચે બધું બસ ફોનના સ્ક્રીને,
છતાં જૂની કિતાબોમાં, સદા વિશ્વાસ વાંચું છું.

પરાગે પુસ્તકો વચ્ચે ગુલાબી ફૂલ મૂક્યું’તું,
હવે એ પાંખડી સૂકી, છતાં ઉલ્લાસ વાંચું છું.

– પરાગ રતનપરા

#ગઝલ #વાંચન #પુસ્તક #માનોહાથ #જ્ઞાન #પરાગરતનપરા
#GujaratiGhazal #Reading #LoveOfBooks #MothersWisdom #Knowledge #ParagRatanpara