ત્રાજવે ક્યાંથી?

હૃદયમાં ઊઠતા એવા ઉમંગો ત્રાજવે ક્યાંથી?
નદીનાં નીરમાં નાચે તરંગો ત્રાજવે ક્યાંથી?

થયું મોડું, પહોંચ્યો ઘર, રસોડે રાહ જોતો'તો,
હતા એ બંગડીઓના મૃદંગો ત્રાજવે ક્યાંથી?

ખભે બેસી પિતાના મેં ઉડાડ્યા'તા અગાશીએ,
હજી આકાશમાં ઊડે, પતંગો ત્રાજવે ક્યાંથી?

વસે પરદેશ બેટો, ફોન પર તો રોજ હસતો'તો,
છતાં બાના હૃદયમાં જે સુરંગો ત્રાજવે ક્યાંથી?

પરાગે ફૂલને તોળ્યું, હવામાં મ્હેક વેરાતી,
ઉડે છે મ્હેકના એવા વિહંગો ત્રાજવે ક્યાંથી?

– પરાગ રતનપરા

#ગઝલ #લાગણી #ભાવના #અમૂલ્ય #સંબંધ #પરાગરતનપરા
#GujaratiGhazal #Emotions #PricelessFeelings #Relationships #Tenderness #ParagRatanpara