તરસ છે

સમંદર કિનારે નદીની તરસ છે,
અમારી કથામાં સદીની તરસ છે.

ઝરે ઝાકળો તો ય ભીની થતી ના,
ન ખીલી શકેલી કળીની તરસ છે.

ગયા ભેરુ સૌ દૂર પરદેશ, તો યે
રમતમાં અધૂરી ગલીની તરસ છે.

ઘરે ફ્રિજ ભરી બૉટલો છે, છતાં યે
ગળાને અષાઢી ઝડીની તરસ છે.

પરાગે હવામાં ભમીને જગત, પણ
ફરી ફૂલ પર એ ઘડીની તરસ છે.

– પરાગ રતનપરા

#ગઝલ #તરસ #ઝંખના #બાળપણ #અધૂરપ #પરાગરતનપરા
#GujaratiGhazal #Thirst #Yearning #ChildhoodFriends #Incompleteness #ParagRatanpara