રિઝલ્ટ

નાપાસ થયો તો શું થયું, ભાઈ, નાપાસ થયો તો શું?
પાસ થયેલા ઑફિસ જાશે, હું તો ઘરનો રાજા છું!

ગણિતના દાખલા ગૂંચવાયા, ને ઇતિહાસે ભૂલ્યો સાલ,
અંગ્રેજીમાં ‘સ્પેલિંગ’ ભૂલ્યો, પણ ગાયાં ગીતો કમાલ;
રિઝલ્ટ જોઈ બાપુ બોલ્યા: ‘આ ઘરમાં કોણે જણ્યો તું?’…
નાપાસ થયો તો શું થયું…

પડોશીનો પિન્ટુ આવ્યો પહેલો, મોં પર ચશ્માં જાડાં,
મારે તો મેદાન, પતંગ, ને ભાઈબંધોનાં ધાડાં;
માર્ક્સ ઓછા, પણ હસવું ઝાઝું, એમાં કોણ ગણે ખોટું?…
નાપાસ થયો તો શું થયું…

પરાગ કહે: આ કાગળિયાંથી કોઈ ન નક્કી થાતું,
ગાંધી, એડિસન, ને આઈન્સ્ટાઈનનું પણ ક્યાં માપ લખાતું?
ફરી બેસજે, હિંમત રાખજે, જીવન છે મોટો ગુરુ…
નાપાસ થયો તો શું થયું, ભાઈ, નાપાસ થયો તો શું?

– પરાગ રતનપરા