પી જતો

આભ કોરુંકટ, ધરા ફાટી, તળાવો પી જતો,
ને દુકાળ જ ફાઇલોના સૌ ઠરાવો પી જતો.

ઢોર વેચાયાં, ગયા બે છોકરા પરદેશમાં,
આંગણાના લીમડાના સૌ લગાવો પી જતો.

આજ છાપામાં ખબર: ‘ખેડૂત ફાંસે ઝૂલિયો’,
રોજનો ઘોંઘાટ આવા સૌ બનાવો પી જતો.

મા પિવાડે બાળને જળ, ખુદ રહે તરસી સદા,
પાલવો માનો બધાયે એ અભાવો પી જતો.

ફૂલ ખીલ્યાં ના, પરાગે ક્યાં જવું, ક્યાં ઊડવું?
ગંધનો સઘળોય મીઠો એ સ્વભાવો પી જતો.

– પરાગ રતનપરા

#ગઝલ #દુકાળ #ખેડૂત #ગામડું #વ્યવસ્થા #પરાગરતનપરા
#GujaratiGhazal #Drought #FarmersDistress #RuralIndia #Apathy #ParagRatanpara