પટારો

હજી મ્હેકે, પડી છે બા તણી સાડી પટારામાં,
સજેલી ઢીંગલી જાણે નવી લાડી પટારામાં.

ખરીદી’તી પિતાએ બે જ આનામાં, હતા મેળે,
હજી ખખડે, હતી જે ટીનની ગાડી પટારામાં.

દબાયું પુસ્તકે જે ફૂલ, સૂકું તોય મ્હેકે છે,
વસી ગઈ છે સ્મરણ કેરી ભરી વાડી પટારામાં.

હતી બાએ લખેલી, ગીતથી ભરપૂર એ પોથી,
મળી, પણ જીર્ણ થઈ, અડધી હતી ફાડી પટારામાં.

‘પરાગે’ ખોલતાં, ઊઠી સુગંધી સાત પેઢીની,
હજી ચાલે સમયની જે હતી નાડી પટારામાં.

– પરાગ રતનપરા

#ગઝલ #પટારો #સ્મૃતિ #બાળપણ #પેઢીઓ #પરાગરતનપરા
#GujaratiGhazal #OldTrunk #Memories #Heirlooms #Generations #ParagRatanpara