નથી માગ્યું

ભલે ખાલી હતું ખિસ્સું, કદી નાણું નથી માગ્યું,
હતી ભૂખી ઘણી રાતો, છતાં ભાણું નથી માગ્યું.

વહી ગઈ ઝૂંપડી પૂરે, ગગન નીચે સમાયા સૌ,
અમીરોના મહેલોમાં ય ઠેકાણું નથી માગ્યું.

ભલે ઝાંખા હતા સૂરો, ગળું મારું, ગઝલ મારી,
ઉછીનું કોઈનું ક્યારે ય મેં ગાણું નથી માગ્યું.

મરણ આવ્યું, હસી ભેટ્યો, ન કરગર્યો જરા પણ હું,
વધારાની ઘડી કે ના નવું ટાણું નથી માગ્યું.

પરાગે દીકરી દીધી, હૃદયનો હીર પણ દીધો,
વિદાયે આંસુ દીધાં, ને કશું આણું નથી માગ્યું.

– પરાગ રતનપરા

#ગઝલ #ખુદ્દારી #સ્વાભિમાન #ગરીબી #ગૌરવ #પરાગરતનપરા
#GujaratiGhazal #SelfRespect #Dignity #Poverty #Pride #ParagRatanpara