ના જોઈએ

ભીતરે અજવાસ હો તો ડુંગરો ના જોઈએ,
શાંત જળને તાગવા કો’ કાંકરો ના જોઈએ.

મંચ પર જઈ જે ગરજતા, એ ભલે ગાજ્યા કરે,
સાચને ગાવા કદી કો’ ચોતરો ના જોઈએ.

જે ઘરે ખુલ્લાં હૃદય, ત્યાં બારણે તાળાં નથી,
આવનારાને પછી તો ઉંબરો ના જોઈએ.

વૃદ્ધઘરના ઓટલે બેઠેલ મા બોલી હસી:
‘સાચવે જો લાકડી, તો દીકરો ના જોઈએ.’

ગંધ થઈ ઊડી ગયો જે, આભ એનું ઘર, ‘પરાગ’,
એ હવાને સોનવરણો પીંજરો ના જોઈએ.

– પરાગ રતનપરા

#ગઝલ #વૈરાગ્ય #સાદગી #ભીતરનોપ્રકાશ #વૃદ્ધમા #પરાગરતનપરા
#GujaratiGhazal #Detachment #InnerLight #Simplicity #OldAgeHome #ParagRatanpara