મારા સુધી

ના કદી પ્હોંચી અહીં એ રોશની મારા સુધી,
આંગણે ચાંદો હતો, ના ચાંદની મારા સુધી.

બંધ દરવાજે ટકોરા રોજ દઈને જાય છે,
તોય પ્હોંચી ક્યાં કદી એ લાગણી મારા સુધી?

બા ગયાં, ને ઠાર લાગે છે શિયાળે આજ પણ,
ના હવે પ્હોંચે કદી એ ઓઢણી મારા સુધી.

વાંસળી વાગી હતી કો' દૂરના વગડા મહીં,
પણ પવન લાવ્યો નહીં એ રાગિણી મારા સુધી.

આ પરાગે બીજ વાવ્યાં શબ્દનાં ચારે તરફ,
તોય ના આવી કદી એ વાવણી મારા સુધી.

– પરાગ રતનપરા

#ગઝલ #ભીતર #અંતર #એકલતા #આત્મખોજ #પરાગરતનપરા
#GujaratiGhazal #InnerDistance #ClosedHeart #Loneliness #SelfDiscovery #ParagRatanpara