માળિયું

દિવાળી આવી, ને બાએ માળિયું ખોલ્યું રે,
ધૂળ ખંખેરી, ત્યાં એક સંભારણું બોલ્યું રે.

પતરાની પેટીમાંથી નીકળ્યું મારું દફતર,
પાટી, પેન, લખોટી, ને જૂનું એક ચિતર;
દાદાનું ચશ્મું જોઈ બાપુનું મન ડોલ્યું રે…
દિવાળી આવી…

કાળો પડેલો ફાનસ, ને કાટ ખાધેલ તાળું,
લગનની જૂની ચૂંદડીએ બાનું મુખ અજવાળું;
ફેંકવાનું કંઈ ના મળ્યું, આખું ઘર તોલ્યું રે…
દિવાળી આવી…

પરાગ કહે: મનનું માળિયું પણ ખોલો દિવાળીએ,
વેરઝેરની ધૂળ ઝાટકો, હેતથી ઘર ઉજાળીએ;
જેણે મન સાફ કર્યું, એણે સ્વર્ગનું બારણું ખોલ્યું રે…
દિવાળી આવી…

– પરાગ રતનપરા