માગું છું

નથી ધન-ધાન માગ્યું મેં, નિરાંતી રાત માગું છું,
નથી ગ્રંથો, નથી ભાષણ, ઘડીભર વાત માગું છું.

બધાને જોઈએ આકાશ આખું, ને ધરા આખી,
મળે બસ ઓસરી-તડકો, ખરી સોગાત માગું છું.

બધે મ્હોરાં, બધે પડદા, બધે ઓળખ ઉછીની છે,
ઉતારી સૌ મુખોટાં, બસ ઉઘાડી જાત માગું છું.

દુકાનોમાં બધું મળતું, ભલે મોંઘું, ભલે સસ્તું,
મળે ના જે બજારે, એ જરા ઔકાત માગું છું.

પરાગે ફૂલ સાથે ઊગવું, ખરવું ય એની સાથ,
ફરી ખીલું, ફરી ઝાકળ, નવું પરભાત માગું છું.

– પરાગ રતનપરા

#ગઝલ #પ્રાર્થના #સાદગી #સંતોષ #આત્મખોજ #પરાગરતનપરા
#GujaratiGhazal #Prayer #Simplicity #Contentment #TrueSelf #ParagRatanpara