માછણનું ગીત

દરિયો મારો સાયબો રે, ને દરિયો મારી સોતન,
વહાણ લઈને ગયો સાયબો, સૂનું થયું આ જીવન.

સવારે એ જાળ લઈને, મોજે મોજે જાતો,
સાંજે છીપલાં, માછલાં ને ખારો પવન લાવતો;
આજ ત્રીજી સાંજ ઢળી, ને ખાલી ખાલી આંગણ…
દરિયો મારો સાયબો રે…

કાંઠે બેઠી છીપલાં વીણું, ગણું રે દિવસ-રાત,
દીવાદાંડી, તું જ કહે ને, ક્યાં છે મારો નાથ?
તોફાને પણ દીવો રાખ્યો, ઓલવાયો ના એક ક્ષણ…
દરિયો મારો સાયબો રે…

પરાગ કહે: દૂર ક્ષિતિજે સઢ દેખાયો ધોળો,
માછણ દોડી, ઝાંઝર ભીનાં, ઓઢણી ખારો ખોળો;
દરિયાએ પાછો આપ્યો સાયબો, ખીલી ઊઠ્યું મન…
દરિયો મારો સાયબો રે…

– પરાગ રતનપરા