ક્યાં રહી?

એ પ્રણયની વાતડી, એ રાત મીઠી ક્યાં રહી?
ભીંતમાં સંતાડતાં’તાં, એ જ ચિઠ્ઠી ક્યાં રહી?

લગ્નની તસવીરમાં તો મલકતાં’તાં બેઉ જણ,
ગાલ પર ચોળી હતી તેં, તે ય પીઠી ક્યાં રહી?

તું ઝરૂખે ઊભતી, ને હું ગલીમાં ઘૂમતો,
એ ઝરૂખાની ઝલક, જે રોજ દીઠી, ક્યાં રહી?

એ હવે ચશ્માં ચડાવી શોધતી ચાવી બધે,
નેણની એ તીરછી નજરો અદીઠી ક્યાં રહી?

વાળ ધોળા, પણ હસીને એ કહે છે, ઓ ‘પરાગ’,
પ્રેમ તો છે, બસ જરા એ ગરમ ભઠ્ઠી ક્યાં રહી?

– પરાગ રતનપરા

#ગઝલ #પ્રૌઢપ્રેમ #દાંપત્ય #હળવીરમૂજ #યુવાનીનીયાદ #પરાગરતનપરા
#GujaratiGhazal #LoveInMiddleAge #MarriedLife #LightHumour #YouthfulMemories #ParagRatanpara