કોતરે

આ ઉધઈ જેવો સમય મુજ અક્ષરોને કોતરે,
ને પછી ધીમે રહી એ ઉંબરોને કોતરે.

દીકરીઓ ઊડતાં ઘર સાવ સૂનાં થઈ ગયાં,
યાદ પાછી રોજ આવી પિંજરોને કોતરે.

ટેકરીના એક પથ્થર પર લખેલાં નામ બે,
વાયરો ભીનો હવે એ પથ્થરોને કોતરે.

લગ્નના આલ્બમ મહીં હળદર હવે ઝાંખી પડી,
કાળની આ ધૂળ ધીમે અવસરોને કોતરે.

શું પરાગે સાચવેલી મ્હેકને ભૂંસી શકે?
કાળ તો શીશી મહીંનાં અત્તરોને કોતરે.

– પરાગ રતનપરા

#ગઝલ #સમય #સ્મરણ #ઘસારો #જૂનીયાદો #પરાગરતનપરા
#GujaratiGhazal #TimeErodes #Memories #FadingPhotographs #Impermanence #ParagRatanpara