ખૂટી ગયું

ઠંડી હતી, લાંબી હતી, ને તાપણું ખૂટી ગયું,
ઢાંક્યાં બધાં સંતાનને, ને ઓઢણું ખૂટી ગયું.

એ દીકરી પરણી, બધું ઘર ઝૂમતું ગાતું હતું,
એ સાસરે ચાલી, પછી આ આંગણું ખૂટી ગયું.

જે પારણે ઝૂલ્યા અમે, ઝૂલ્યા પિતા, દાદા ય પણ,
આ ફ્લેટમાં આવ્યા પછી એ પારણું ખૂટી ગયું.

વર્ષો સુધી ઈંટો ચણી, બાંધ્યું ભલે મોટું મકાન,
પણ આવવા કો’ને દિલે એ બારણું ખૂટી ગયું.

આ બાગને મ્હેકાવતાં વેરાઈ ગ્યો આખો પરાગ,
પોતા તણા ઘરને જ ત્યાં એ તોરણું ખૂટી ગયું.

– પરાગ રતનપરા

#ગઝલ #અભાવ #મા #દીકરી #ત્યાગ #પરાગરતનપરા
#GujaratiGhazal #NeverEnough #MothersSacrifice #DaughtersFarewell #EmptyHome #ParagRatanpara